கூகுள் நிறுவனம் ரஷ்யாவில் சட்டவிரோதம் என கருதப்படும் தகவல்களை நீக்க தொடர்ந்து தாமதம் செய்து வந்ததால், மாஸ்கோ நீதிமன்றம் கூகுள் நிறுவனத்திற்கு 7.2 பில்லியன் ரூபிள், அதாவது இந்திய மதிப்பில் சுமார் ரூ. 735 கோடி அபராதம் விதித்துள்ளது.
எனினும், நிறுவனம் ஒன்றின் வருடாந்திர வருவாயில் இருந்து குறிப்பிட்ட விழுக்காட்டினை அபராதமாக விதித்திருப்பது இதுவே முதல் முறை என்பது குறிப்பிடத்தக்கது.
ரஷ்யாவில் ரொக்கம் சார்ந்து விதிக்கப்பட்டுள்ள முதல் அபராதம் இது ஆகும். நடவடிக்கை எடுக்கும் முன் நீதிமன்ற உத்தரவை ஆய்வு செய்ய இருப்பதாக கூகுளின் தலைமை நிறுவனமான ஆல்பாபெட் தெரிவித்துள்ளது. இந்த ஆண்டு தொடக்கம் முதல் பலமுறை ரஷ்யா வெளிநாட்டு தொழில்நுட்ப நிறுவனங்களுக்கு அபராதம் விதித்து வருகிறது.
ரஷ்ய நீதிமன்றம் கூகுள் நிறுவனத்திற்கு எத்தனை விழுக்காடு அபராதம் விதித்துள்ளது என்பதை அறிவிக்கவில்லை. எனினும், அபராத தொகையை கொண்டு மேற்கொள்ளப்பட்ட கணக்கீடுகளின் படி, கூகுள் நிறுவனத்திற்கு 8 விழுக்கா அபராதம் விதிக்கப்பட்டு இருப்பதாக தகவல் வெளியாகி உள்ளது.
போதை பொருள் சம்பந்தமான பதிவுகளை விளம்பரப்படுத்தும் தகவல்கள், வீட்டில் தயாரிக்கப்பட்ட ஆயுதங்கள் மற்றும் வெடிமருந்துகள் குறித்த விவரங்கள் அடங்கிய பதிவுகளை நீக்க தொழில்நுட்ப நிறுவனங்களுக்கு ரஷ்யா உத்தரவிட்டிருந்தது.
இதனை உடனடியாக நீக்காத நிறுவனங்களுக்கு ரஷ்ய நீதிமன்றம் அபராதம் விதித்து வருகிறது. கூகுளைத் தொடர்ந்து மெட்டா (பேஸ்புக்) நிறுவனத்திற்கும் பெரும் தொகை அபராதமாக விதிக்கப்பட்டுள்ளது