ಸೆಪ್ಟೆಂಬರ್‌ನಲ್ಲಿ Jio ಟೆಲಿಕಾಂಗೆ ಭರ್ಜರಿ ಗ್ರಾಹಕರ ಸೇರ್ಪಡೆ: ಏರ್‌ಟೆಲ್‌ಗಿಂತ 10 ಪಟ್ಟು ಹೆಚ್ಚು!
Follow Us
ರಿಲಯನ್ಸ್ Jio ಭಾರತದ ಟೆಲಿಕಾಂ ಕ್ಷೇತ್ರದಲ್ಲಿ ತಾನೇಕೆ ದೊಡ್ಡಣ್ಣ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ. ಟ್ರಾಯ್ ಬಿಡುಗಡೆ ಮಾಡಿರುವ ಸೆಪ್ಟೆಂಬರ್ ತಿಂಗಳ ವರದಿಯ ಪ್ರಕಾರ, ದೇಶದ ಮೂಲ ಮೊಬೈಲ್ ಚಂದಾದಾರರ ಶೇಕಡಾವಾರು ಬೆಳವಣಿಗೆಗೆ ಜಿಯೋವೇ ಚಾಲಕ ಶಕ್ತಿಯಾಗಿದೆ. ಇದೇ ಅವಧಿಯಲ್ಲಿ ಏರ್‌ಟೆಲ್ ಇತ್ತೀಚಿನ ತಿಂಗಳುಗಳಲ್ಲೇ ಅತ್ಯಂತ ಕನಿಷ್ಠ ಗ್ರಾಹಕರ ಸೇರ್ಪಡೆಯನ್ನು ದಾಖಲಿಸಿದೆ.
SurveyAlso Read : ಅಗ್ಗದ ದರದ Redmi A7 Pro 5G ಮೊಬೈಲ್ ಈಗ ಭಾರೀ ಡಿಸ್ಕೌಂಟ್‌ನಲ್ಲಿ ಲಭ್ಯ!
Jio ಗ್ರಾಹಕರ ಸಂಖ್ಯೆ ಹೆಚ್ಚಳ
ವಿಶ್ಲೇಷಕರ ವರದಿಗಳ ಪ್ರಕಾರ, ‘ಮೆಷಿನ್-ಟು-ಮೆಷಿನ್’ ( ಎಂ2ಎಂ) ಸಂಪರ್ಕಗಳನ್ನು ಹೊರತುಪಡಿಸಿ, ಭಾರತದ ಮೂಲ ಮೊಬೈಲ್ ಚಂದಾದಾರರ ಸಂಖ್ಯೆ ತಿಂಗಳಿಂದ ತಿಂಗಳಿಗೆ 2.2 ಮಿಲಿಯನ್ (22 ಲಕ್ಷ) ಹೆಚ್ಚಳವಾಗಿ ಒಟ್ಟು 1.15 ಬಿಲಿಯನ್‌ಗೆ (115 ಕೋಟಿ) ತಲುಪಿದೆ. ಇದರಲ್ಲಿ ಜಿಯೋ ಸಿಂಹಪಾಲು ಪಡೆದಿದ್ದು, ಭರ್ಜರಿ 1.9 ಮಿಲಿಯನ್ (19 ಲಕ್ಷ) ಗ್ರಾಹಕರನ್ನು ಸೇರಿಸಿಕೊಂಡಿದ್ದರೆ, ಏರ್‌ಟೆಲ್ ಕೇವಲ 0.2 ಮಿಲಿಯನ್ (2 ಲಕ್ಷ) ಗ್ರಾಹಕರನ್ನಷ್ಟೇ ಗಳಿಸಲು ಸಾಧ್ಯವಾಯಿತು. ಅಂದರೆ, ಜಿಯೋ ಗ್ರಾಹಕರ ಸೇರ್ಪಡೆ ಏರ್‌ಟೆಲ್‌ಗಿಂತ ಸುಮಾರು ಹತ್ತು ಪಟ್ಟು ದೊಡ್ಡದಾಗಿದೆ. ಸೆಪ್ಟೆಂಬರ್ ಅಂತ್ಯಕ್ಕೆ ಜಿಯೋ ಒಟ್ಟು 511.14 ಮಿಲಿಯನ್ ಚಂದಾದಾರರೊಂದಿಗೆ ಅಗ್ರಸ್ಥಾನದಲ್ಲಿದ್ದರೆ, ಏರ್‌ಟೆಲ್ 494.29 ಮಿಲಿಯನ್ ಚಂದಾದಾರರೊಂದಿಗೆ ಎರಡನೇ ಸ್ಥಾನದಲ್ಲಿದೆ.
ಏರ್‌ಟೆಲ್ ಕೇವಲ 2 ಲಕ್ಷ ಮೂಲ ಮೊಬೈಲ್ ಗ್ರಾಹಕರನ್ನು ಪಡೆದಿರುವುದು ಇತ್ತೀಚಿನ ಅವಧಿಯಲ್ಲಿ ಅದರ ಅತ್ಯಂತ ಕನಿಷ್ಠ ಸಾಧನೆಯಾಗಿದೆ. ಆಗಸ್ಟ್‌ನಲ್ಲಿ ತನ್ನ ಜನಪ್ರಿಯ ಹಾಗೂ ಕಡಿಮೆ ಬೆಲೆಯ 299 ರೂ.ಗಳ ಪ್ರಿಪೇಯ್ಡ್ ಪ್ಲಾನ್ ಅನ್ನು ಸ್ಥಗಿತಗೊಳಿಸಿದ್ದೇ ಈ ಹಿನ್ನಡೆಗೆ ಮುಖ್ಯ ಕಾರಣ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಈ ನಿರ್ಧಾರದಿಂದಾಗಿ ಹಣದ ಬಗ್ಗೆ ಹೆಚ್ಚು ಯೋಚಿಸುವ ಗ್ರಾಹಕರನ್ನು ಉಳಿಸಿಕೊಳ್ಳಲು ಏರ್‌ಟೆಲ್‌ಗೆ ಸಾಧ್ಯವಾಗಲಿಲ್ಲ.
ಆಗಸ್ಟ್‌ನಲ್ಲಿ ಏರ್‌ಟೆಲ್‌ನ ಒಟ್ಟಾರೆ ವೈರ್‌ಲೆಸ್ ಗ್ರಾಹಕರ ಸೇರ್ಪಡೆ 2.69 ಮಿಲಿಯನ್ ಆಗಿದ್ದರೂ, ಮೂಲ ಮೊಬೈಲ್ ಬಳಕೆದಾರರ ಸಂಖ್ಯೆ ಮಾತ್ರ ತೀರಾ ಕಡಿಮೆಯಾಗಿದೆ. ಅಂದರೆ, ಕಂಪನಿಗೆ ಬಂದ ಹೊಸ ಚಂದಾದಾರರಲ್ಲಿ ಹೆಚ್ಚಿನವರು ನಿತ್ಯದ ಮೊಬೈಲ್ ಬಳಕೆದಾರರಿಗಿಂತ ಕಡಿಮೆ ಆದಾಯ ತಂದುಕೊಡುವ (Low-ARPU) ಎಂ2ಎಂ ಸಂಪರ್ಕ ಸೇವೆಯ ಗ್ರಾಹಕರಾಗಿದ್ದಾರೆ ಎಂಬುದನ್ನು ಇದು ಸೂಚಿಸುತ್ತದೆ.
ಜಿಯೋ ನಂಬರ್ ಒನ್
ಖಾಲಿ ಸಿಮ್‌ಗಳಿಗಿಂತ ಸಕ್ರಿಯ ಬಳಕೆದಾರರ ವಿಷಯಕ್ಕೆ ಬಂದರೆ ಜಿಯೋದ ಪ್ರಾಬಲ್ಯ ಇನ್ನಷ್ಟು ಸ್ಪಷ್ಟವಾಗುತ್ತದೆ. ಸೆಪ್ಟೆಂಬರ್‌ನಲ್ಲಿ ಉದ್ಯಮದಾದ್ಯಂತ ಮೂಲ ವಿಸಿಆರ್ (ವಿಎಲ್‌ಆರ್ – ಸಕ್ರಿಯ ಗ್ರಾಹಕರು) 0.6 ಮಿಲಿಯನ್ ಬೆಳೆದಿದ್ದರೆ, ಒಂದೇ ಜಿಯೋ ಸಂಸ್ಥೆ 1.3 ಮಿಲಿಯನ್ ಸಕ್ರಿಯ ಬಳಕೆದಾರರನ್ನು ತನ್ನ ಬುಟ್ಟಿಗೆ ಹಾಕಿಕೊಂಡಿದೆ. ಮತ್ತೊಂದೆಡೆ, ಇದೇ ಅವಧಿಯಲ್ಲಿ ಏರ್‌ಟೆಲ್ 0.2 ಮಿಲಿಯನ್ ಹಾಗೂ ವೊಡಾಫೋನ್ ಐಡಿಯಾ 0.3 ಮಿಲಿಯನ್ ಸಕ್ರಿಯ ಗ್ರಾಹಕರನ್ನು ಕಳೆದುಕೊಂಡಿವೆ. ಅಂದರೆ, ದೇಶದ ಖಾಸಗಿ ಟೆಲಿಕಾಂ ಸಂಸ್ಥೆಗಳಲ್ಲಿ ತನ್ನ ಸಕ್ರಿಯ ಬಳಕೆದಾರರ ಪಡೆಯನ್ನು ಹೆಚ್ಚಿಸಿಕೊಂಡ ಏಕೈಕ ‘ಕಿಂಗ್’ ಎಂದರೆ ಅದು ಜಿಯೋ ಮಾತ್ರ.
ಸೆಪ್ಟೆಂಬರ್ ತಿಂಗಳ ಟ್ರಾಯ್ ಅಂಕಿ-ಅಂಶಗಳು ಜಿಯೋ ತನ್ನ ಅಗ್ರಸ್ಥಾನವನ್ನು ಕೇವಲ ಕಾಯ್ದುಕೊಂಡಿಲ್ಲ, ಬದಲಿಗೆ ಮುನ್ನಡೆಯ ಅಂತರವನ್ನು ಮತ್ತಷ್ಟು ಹಿಗ್ಗಿಸಿಕೊಂಡಿದೆ ಎಂಬುದನ್ನು ಸ್ಪಷ್ಟಪಡಿಸಿವೆ. ಹೆಚ್ಚಿನ ಮೂಲ ಚಂದಾದಾರರು, ಗರಿಷ್ಠ ಸಕ್ರಿಯ ಬಳಕೆದಾರರು ಹಾಗೂ ಒಟ್ಟಾರೆ ಬೃಹತ್ ಗ್ರಾಹಕರ ಪಡೆಯೊಂದಿಗೆ ಜಿಯೋ ನಂ.1 ಪಟ್ಟದಲ್ಲಿ ಗಟ್ಟಿಯಾಗಿ ಕುಳಿತಿದೆ.
299 ರೂ.ಗಳ ಪ್ಲಾನ್ ಕೈಬಿಟ್ಟ ನಂತರ ಕುಸಿದಿರುವ ತನ್ನ ವೇಗವನ್ನು ಹೆಚ್ಚಿಸಿಕೊಳ್ಳುವುದು ಏರ್‌ಟೆಲ್‌ಗೆ ಈಗ ದೊಡ್ಡ ಸವಾಲಾಗಿದೆ. ಆದರೆ ಜಿಯೋ ಪಾಲಿಗೆ, ಸೆಪ್ಟೆಂಬರ್‌ನಲ್ಲಿ ಇಡೀ ಟೆಲಿಕಾಂ ರಂಗ ಪಡೆದ ಪ್ರತಿ 10 ಹೊಸ ಗ್ರಾಹಕರಲ್ಲಿ 9 ಜನರನ್ನು ತನ್ನತ್ತ ಸೆಳೆದುಕೊಳ್ಳುವ ಮೂಲಕ ತಾನೇ ಭಾರತೀಯ ಮೊಬೈಲ್ ಮಾರುಕಟ್ಟೆಯ ನಿಜವಾದ ‘ರೇಸ್ ವಿನ್ನರ್’ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.
