ಅತಿ ಹಳೆಯ ಮತ್ತು 90ರ ದಶಕ ಹಾಗೂ 21 ನೇ ಶತಮಾನದ ಆದಿಯಲ್ಲಿ ಇಂಟರ್ನೆಟ್ ಬಳಕೆದಾರರ ನೆಚ್ಚಿನ ಬ್ರೌಸರ್ ಆಗಿದ್ದ ಇಂಟರ್ನೆಟ್ ಎಕ್ಸ್ಪ್ಲೋರರ್ (Internet Explorer) ಜೂನ್ 15 ರಿಂದ ಸ್ಥಗಿತಗೊಳ್ಳಲಿದೆ. ಆ ಮೂಲಕ ಸುಮಾರು 27 ವರ್ಷಗಳ ಬ್ರೌಸರ್ ಇತಿಹಾಸ ಪುಟ ಸೇರಲಿದೆ. ಇಂಟರ್ನೆಟ್ ಎಕ್ಸ್ಪ್ಲೋರರ್ನ ನಿವೃತ್ತಿಗೆ ಇಂಟರ್ನೆಟ್ ಬಳಕೆದಾರರು ಭಾವುಕವಾಗಿ ಪ್ರತಿಕ್ರಿಯಿಸಿದ್ದಾರೆ. ತಮ್ಮ ಅನುಭವಗಳನ್ನು ಟ್ವಿಟರ್ ಸೇರಿ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡು ವಿದಾಯ ಕೋರಿದ್ದಾರೆ.
ಈ ಬಗ್ಗೆ ಮೈಕ್ರೋಸಾಫ್ಟ್ ಅಧಿಕೃತ ಘೋಷಣೆ ಮಾಡಿದ್ದು ಜೂನ್ 15 ರಂದು ಇಂಟರ್ನೆಟ್ ಎಕ್ಸ್ಪ್ಲೋರರ್ ಸೇವೆಯಿಂದ ನಿವೃತ್ತಿಯಾಗಲಿದೆ ಎಂದು ಕಂಪನಿ ಹೇಳಿದೆ. 1995 ರಲ್ಲಿ ಆರಂಭವಾಗಿ 2003 ರ ವರೆಗೂ ಇಂಟರ್ನೆಟ್ ಬಳಕೆದಾರರ ನೆಚ್ಚಿನ ಬ್ರೌಸರ್ ಆಗಿದ್ದ ಇಂಟರ್ನೆಟ್ ಎಕ್ಸ್ಪ್ಲೋರರ್ ಆ ಬಳಿಕ ಮಾರುಕಟ್ಟೆಗೆ ಪ್ರವೇಶ ಮಾಡಿದ ಹೊಸ ಬ್ರೌಸರ್ಗಳ ಅಬ್ಬರ ಮುಂದೆ ಮಂಕಾಗಿತ್ತು. ಆದರೂ ತನ್ನದೇ ಪರಂಪೆಯನ್ನು ಉಳಿಸಿಕೊಂಡು ಬಂದಿತ್ತು. ಇದೀಗ ಮಾರುಟ್ಟೆಯಲ್ಲಿ ಇತರೆ ಕಂಪನಿಗಳ ಬ್ರೌಸರ್ಗೆ ಪೈಪೋಟಿ ಕೊಡಲಾಗದೇ ಇಂಟರ್ನೆಟ್ ಎಕ್ಸ್ಪ್ಲೋರರ್ ಸ್ಥಗಿತಗೊಳ್ಳಲಿದೆ.
2003 ರಲ್ಲಿ ಜಗತ್ತಿನ ಶೇ.93%ರಷ್ಟು ಇಂಟರ್ನೆಟ್ ಬಳಕೆದಾರರು ಇದೇ ಬ್ರೌಸರ್ ಅನ್ನು ಉಪಯೋಗ ಮಾಡುತ್ತಿದ್ದರು. ಇಂಟರ್ನೆಟ್ ಎಕ್ಸ್ಪ್ಲೋರರ್ ಸ್ಥಗಿತಗೊಳ್ಳುವ ಬಗ್ಗೆ ಕಂಪನಿಯೇ ಅಧಿಕೃತ ಹೇಳಿಕೆ ನೀಡಿದ್ದು ಭವಿಷ್ಯದ ವಿಂಡೋಸ್ಗಳಲ್ಲಿ ಮೈಕ್ರೋಸಾಫ್ಟ್ ಎಡ್ಜ್ ಬ್ರೌಸರ್ ಇರಲಿದೆ ಎಂದು ಕಂಪನಿ ಹೇಳಿದೆ.
ಹೊಸ ಬ್ರೌಸರ್ಗಳ ಆಗಮನವಾಗುತ್ತಿದ್ದಂತೆಯೇ ಅವುಗಳ ಹೊಸ ಫೀಚರ್, ಹೊಸತನಗಳ ಮುಂದೆ ಸ್ಪರ್ಧೆ ಒಡ್ಡಲು ಇಂಟರ್ನೆಟ್ ಎಕ್ಸ್ಪ್ಲೋರರ್ ವಿಫಲವಾಗಿದೆ. ಕ್ರಮೇಣವಾಗಿ ಅದನ್ನು ಬಳಕೆ ಮಾಡುವವರ ಸಂಖ್ಯೆ ಕೂಡ ಇಳಿಮುಖವಾಯ್ತು. ಇದೀಗ 27 ವರ್ಷಗಳ ಬಳಿಕ ಕಾರ್ಯಾಚರಣೆ ಮಾಡುವುದನ್ನೇ ನಿಲ್ಲಿಸುವುದಾಗಿ ಮೈಕ್ರೋಸಾಫ್ಟ್ ಹೇಳಿದೆ. ಅಲ್ಲಿಗೆ ಇಂಟರ್ನೆಟ್ ಬಳಕೆ ಆರಂಭವಾದ ಆದಿಯಲ್ಲಿ ಬಳಕೆದಾರರ ನೆಚ್ಚಿನ ಬ್ರೌಸರ್ ಆಗಿದ್ದ ಇಂಟರ್ನೆಟ್ ಎಕ್ಸ್ಪ್ಲೋರರ್ನ ಯುಗ ಅಂತ್ಯವಾಗಿದೆ.
ಇನ್ನು ಇಂಟರ್ನೆಟ್ ಎಕ್ಸ್ಪ್ಲೋರರ್ ಸ್ಥಗಿತಕ್ಕೆ ನೆಟ್ಟಿಗರು ಭಾವುಕವಾಗಿ ಪ್ರತಿಕ್ರಿಯೆ ನೀಡಿದ್ದಾರೆ. ಬಾಲ್ಯದಲ್ಲಿ ಇಂಟರ್ನೆಟ್ ಎಕ್ಸ್ಪ್ಲೋರರ್ ಮೂಲಕ ತಾವು ಸರ್ಫಿಂಗ್ ಮಾಡಿಕೊಂಡಿದ್ದನ್ನು ಮೆಲುಕು ಹಾಕಿ ಹಳೇಯ ಬ್ರೌಸರ್ಗೆ ಶುಭವಿದಾಯ ಹೇಳಿದ್ದಾರೆ. ಇನ್ನೂ ಇಂಟರ್ನೆಟ್ ಎಕ್ಸ್ಪ್ಲೋರರ್ ಅನ್ನೇ ನಾನು ಬಳಕೆ ಮಾಡುತ್ತಿದ್ದೇನೆ. ಅದರ ನಿವೃತ್ತಿಯಿಂದಾಗಿ ನನಗೆ ಬೇಸರವಾಗಿದೆ ಎಂದು ಓರ್ವ ನೆಟ್ಟಿಗ ಹೇಳಿಕೊಂಡಿದ್ದಾರೆ. ಹಲವು ಮೀಮ್ಸ್ಗಳು ಕೂಡ ಹರಿದಾಡುತ್ತಿವೆ.