1995 August 15-നാണ് VSNL ഇന്ത്യയിൽ ആദ്യമായി പൊതു ഇന്റർനെറ്റ് ആരംഭിച്ചത്. BSNL-ന് സമാനമായ മറ്റൊരു സർക്കാഡ ടെലികോം കമ്പനിയായിരുന്നു വിദേശ് സഞ്ചാർ നിഗം ലിമിറ്റഡ്. ഇന്ത്യയിൽ നെറ്റ് വർക്ക് സേവനം ആരംഭിച്ചതിൽ എന്താണിത്ര പ്രത്യേകത എന്നാണോ? ഇന്ന് കണക്റ്റിവിറ്റിയിൽ കുതിക്കുന്ന ചൈനയ്ക്കും പോലും 1995-ൽ സാധിക്കാത്ത നേട്ടമാണ് 30 വർഷം മുമ്പ് ആരംഭിച്ചത്.

Videsh Sanchar Nigam Limited ഇന്ന് സ്വകാര്യവൽക്കരിക്കപ്പെട്ടെങ്കിലും മുമ്പ് ബിഎസ്എൻഎൽ പോലെ സർക്കാരിന്റെ കീഴിലായിരുന്നു. ഇന്ത്യയിലെ മാത്രം ടെലികോം സേവനങ്ങളായിരുന്നു ബിഎസ്എൻഎൽ നൽകിയത്. എന്നാൽ അന്തർദേശീയ ടെലികമ്മ്യൂണിക്കേഷൻ സേവനമാണ് വിഎസ്എൻഎല്ലിൽ നിന്ന് ലഭിച്ചിരുന്നത്. വിഎസ്എൻഎൽ വഴി ഇന്ത്യയിലേക്ക് പൊതു ഇന്റർനെറ്റ് എത്തുമ്പോൾ WWW വേഗത കുറവായിരുന്നു. എന്നാൽ ഇന്റർനെറ്റ് വളരെ ചെലവ് കൂടിയ സേവനം കൂടിയായിരുന്നു. ഇന്ത്യ ഓഗസ്റ്റ് 15-ന് തുടക്കമിട്ടത് ചരിത്രനിമിഷമായിരുന്നു. ചൈന പോലും പിന്നീട് ഇന്ത്യയിൽ വന്ന് കണ്ടുപഠിച്ചാണ് ഇന്റർനെറ്റിന് തുടക്കമിട്ടത്.

ചൈനയ്ക്ക് ഇന്ത്യയാണ് പ്രചോദനമായതെങ്കിൽ, ഇന്ത്യയ്ക്ക് ജപ്പാൻ, ആസ്ട്രേലിയ രാജ്യങ്ങളാണ്.

VSNL vs MTNL

എന്തുകൊണ്ടാണ് ആദ്യ ഇന്റർനെറ്റിന് ഇന്ത്യ വിഎസ്എൻഎല്ലിനെ തന്നെ തെരഞ്ഞെടുത്തത്. നിലവിലുള്ള അന്താരാഷ്ട്ര കണക്റ്റിവിറ്റിയും വിദേശ കാരിയറുകളുമായുള്ള ബന്ധവുമാണ് അന്താരാഷ്ട്ര ടെലികമ്മ്യൂണിക്കേഷനായ വിഎസ്എൻഎല്ലിന് ചുമതല നൽകാൻ കാരണം.

DoT, MTNL പോലുള്ളവർ സർക്കാർ വകുപ്പിന്റെ കീഴിലുണ്ടായിരുന്നു. എങ്കിലും പകരം VSNL-നെയാണ് കമ്പനി തെരഞ്ഞെടുത്തത്. മറ്റ് രാജ്യങ്ങളിലെ ഇന്റർനെറ്റ് സേവന ദാതാക്കളുമായി ബന്ധം സ്ഥാപിക്കുന്നതിന് ഇത് നിർണായകമാകുമെന്നും കമ്പനി വിശ്വസിച്ചു.

ബ്രിട്ടീഷ് ടെലികോം, എടി ആൻഡ് ടി തുടങ്ങിയ ആഗോള ടെലികോം ഭീമന്മാരുമായി വിഎസ്എൻഎൽ ആസൂത്രണം നടത്തി. യുഎസ്, യുകെ തുടങ്ങിയ പ്രധാന സ്ഥലങ്ങളിലേക്ക് കമ്പനി 128 കെബിപിഎസ് ലൈനുകൾ സുരക്ഷിതമാക്കി. ഇങ്ങനെ നെറ്റ് വർക്കിന് ആവശ്യമായ ഹാർഡ്‌വെയറും സെർവറുകളും സ്ഥാപിച്ചു.

ഡൽഹി, ബോംബെ, കൊൽക്കത്ത, മദ്രാസ്, പൂനെ എന്നീ അഞ്ച് നഗരങ്ങളിലാണ് വിഎസ്എൻഎൽ ആദ്യം സേവനം ആരംഭിച്ചത്. ടെക്നോളജിയുടെ ഹബ്ബായ ബെംഗളൂരു എന്തുകൊണ്ട് അന്ന് ലിസ്റ്റിലില്ലായിരുന്നു എന്നത് കൌതുകമായിരിക്കും, അല്ലേ? ബാംഗ്ലൂർ പ്രധാനപ്പെട്ട വിപണിയായിരുന്നെങ്കിലും, ലോജിസ്റ്റിക്കൽ സൗകര്യത്തിനായി പൂനെയാണ് മികച്ചതെന്ന് കരുതി. അങ്ങനെ 1995 ഓഗസ്റ്റ് 15 ന് സ്വാതന്ത്ര്യദിനത്തിൽ നെറ്റ് വർക്ക് ലോഞ്ച് ചെയ്തു.

ഇന്ന് പലർക്കും ഇന്റർനെറ്റ് എന്നാലോചിക്കുമ്പോൾ 5ജി സ്പീഡായിരിക്കും മനസിൽ വരുന്നത്. അങ്ങനെയല്ല, ആദ്യകാല ഇന്റർനെറ്റ് അനുഭവം ഇന്നത്തേതിൽ നിന്ന് വളരെ വ്യത്യസ്തമായിരുന്നു. ഇന്ത്യൻ വീടുകളിൽ പേഴ്സണൽ കമ്പ്യൂട്ടറുകൾ ഇന്നത്തെ പോലെ സാധാരണമായിരുന്നില്ല. നഗരങ്ങളിലുള്ള ഏതാനും വീടുകളിൽ മാത്രമായിരുന്നു പിസികൾ ഉണ്ടായിരുന്നത്. അതുപോലെ അന്ന് Slow Internet ആയിരുന്നെങ്കിലും അതിന്റെ ചെലവ് വളരെ കൂടുതലായിരുന്നു.

ഉദാഹരണത്തിന് ഏറ്റവും താങ്ങാനാവുന്ന പ്ലാനായ 9.6 കെബിപിഎസ് ഡയൽ-അപ്പ് കണക്ഷന് പ്രതിവർഷം 15,000 രൂപ ചിലവാകുമായിരുന്നു. ഇന്നത്തെ പണപ്പെരുപ്പം കണക്കിലെടുത്താൽ, ഇത് 75,000 രൂപയിൽ കൂടുതലായിരിക്കുമെന്ന് പറയാം. പ്രതിദിനം ശരാശരി 40 മിനിറ്റ് മാത്രമായിരുന്നു ഇന്റർനെറ്റ് ലഭിച്ചിരുന്നത്.

ഇന്ന് നമ്മൾ ട്രൂ 5G-യും കടന്ന് 6ജിയിലേക്കുള്ള തയ്യാറെടുപ്പിലാണ്. ലോകത്തിലെ രണ്ടാമത്തെ വലിയ ഓൺലൈൻ വിപണിയായി ഇന്ത്യ മാറിക്കഴിഞ്ഞു. കഴിഞ്ഞ രണ്ടര പതിറ്റാണ്ടുകളായി നടത്തിയ ഈ യാത്ര ഡിജിറ്റൽ ഇന്ത്യയെ ആഗോളതലത്തിൽ മുന്നിലെത്തിക്കുന്നു.

വിഎസ്എൻഎൽ ടു BSNL

1995-ലെ വിപ്ലവകരമായ തുടക്കത്തിന്റെ സമയത്ത് കമ്പനി സർക്കാരിന്റേതായിരുന്നു. എന്നാൽ 2002-ൽ വിഎസ്എൻഎൽ സർക്കാർ ഓഹരി വിറ്റഴിക്കാൻ തുടങ്ങി. ടാറ്റ ഗ്രൂപ്പ് VSNL-ൽ നിയന്ത്രണ ഓഹരികൾ സ്വന്തമാക്കി. കമ്പനി പിന്നീട് ടാറ്റ കമ്മ്യൂണിക്കേഷൻസ് എന്ന പേരിലേക്ക് മാറി.

അതേ സമയം ഭാരത് സഞ്ചാർ നിഗം ലിമിറ്റഡ് വന്നത് 2000-ത്തിലാണ്. രാജ്യത്തുടനീളമുള്ള ആഭ്യന്തര ടെലികോം സേവനങ്ങൾ കൈകാര്യം ചെയ്യുന്നതിനായാണ് BSNL രൂപീകരിച്ചത്. ഇത് MTNL കൈകാര്യം ചെയ്തിരുന്ന ഡൽഹി, മുംബൈ എന്നിവ ഒഴികെയുള്ള സർക്കിളുകളിൽ സേവനം നടത്തി. തുടരെത്തുടരെ ബിഎസ്എൻഎൽ ആഭ്യന്തരത്തിനൊപ്പം അന്താരാഷ്ട്ര സേവനങ്ങൾക്കുള്ള പ്രഥമ സർക്കാർ കമ്പനിയായി മാറി. ഇന്ന് മെല്ലെപ്പോക്കാണെങ്കിലും ബിഎസ്എൻഎൽ സാധാരണക്കാരുടെ പ്രധാന ടെലികോം കമ്പനിയാണ്.

Also Read: 810 വാട്ട് LG Dolby Atmos Soundbar കൂറ്റൻ ഡിസ്കൗണ്ടിൽ! ഈ ഓണത്തിന് പ്രീമിയം ഹോം തിയേറ്റർ സിസ്റ്റം…

1969 ഓഗസ്റ്റ് 15-നാണ് ഇന്ത്യയുടെ നാഷണൽ സ്പേസ് ഏജൻസിയായ ISRO സ്ഥാപിതമായത്. അതിനാൽ ഭാരതത്തിന്റെ സ്വാതന്ത്ര്യത്തോടൊപ്പം ഇസ്രോയുടെ പിറന്നാൾ കൂടി ചേരുന്ന മധുരമാണ് ഓഗസ്റ്റ് 15. ലോകത്തെ ഏറ്റവും വലിയ ജനാധിപത്യരാജ്യമായി വളർന്ന ഇന്ത്യയുടെ തുടക്കം 1947 ഓഗസ്റ്റ് 15 ആയിരുന്നു. 12 വർഷങ്ങൾക്ക് ശേഷം രാജ്യത്തിന്റെ ആകാശസ്വപ്നങ്ങളെ നെഞ്ചിലേറ്റി ഐഎസ്ആർഒയും തുടക്കമായി.

ശാസ്ത്രീയ വികാസത്തിനും ഇന്ത്യയുടെ വളർച്ചയ്ക്കുമായി സ്പേസ് ടെക്നോളജിയെ ഉപയോഗിക്കുന്നതിനെ കുറിച്ച് മനസിലാക്കിയ വിക്രം സാരാഭായിയുടെ ദീർഘവീക്ഷണത്തിൽ നിന്നുമാണ് ഇസ്രോ വന്നത്. 56th Happy Birthday ആഘോഷിക്കുന്ന Indian Space Research Organisation-ന്റെ സുപ്രധാന 10 നേട്ടങ്ങളറിയാം. ഒപ്പം കുറച്ച് ചരിത്രവും കേരളത്തിലും ബെംഗളൂരു ആസ്ഥാനത്തും, ഗുജറാത്ത്, ഹൈദരാബാദ് ഉൾപ്പെടെയുള്ള ഇടങ്ങളിലെ ഇസ്രോ പ്രവർത്തനങ്ങളും മനസിലാക്കാം.

ISRO സുപ്രധാന 10 നേട്ടങ്ങൾ

ആര്യഭട്ട മുതൽ ചാന്ദ്രയാനും കടന്ന് ഗഗൻയാനിനായി തയ്യാറെടുക്കുകയാണ് ഇസ്രോ. 56 വർഷത്തിലുടനീളം നിങ്ങൾ അറിയാതെ പോയ ചില നിർണായക നേട്ടങ്ങളും ലോകത്തിന് ഇസ്രോ സമ്മാനിച്ചിട്ടുണ്ട്. 10 സുപ്രധാനമായ അഭിമാന വിജയങ്ങൾ ഇതാ…

ആര്യഭട്ട: 1975 ഏപ്രിൽ 19-ന് ഇന്ത്യയുടെ ആദ്യ ഉപഗ്രഹമായ ആര്യഭട്ട വിക്ഷേപണം നടത്തി. സോവിയറ്റ് യൂണിയന്റെ കപുസ്റ്റിൻ യാറിൽ നിന്ന് വിക്ഷേപിച്ച ആര്യഭട്ട ഉപഗ്രഹം എക്സ്-റേ ജ്യോതിശാസ്ത്രം, സൗരഭൗതികശാസ്ത്രം, വ്യോമയാനം എന്നിവയ്ക്കായാണ് വിക്ഷേപണം ചെയ്‌തത്. എന്നാൽ Satellite വിക്ഷേപിച്ചത് സോവിയറ്റ് യൂണിയന്റെ(റഷ്യ) സഹായത്തിലാണ്.

SLV-3: അഞ്ച് വർഷത്തിന് ശേഷം, 1980 ജൂലൈ 18 ന്, ISRO രോഹിണി ഉപഗ്രഹം SLV-3 ഉപയോഗിച്ച് ലോഞ്ച് ചെയ്തു. ഇന്ത്യയുടെ ആദ്യത്തെ തദ്ദേശീയമായി വികസിപ്പിച്ച വിക്ഷേപണ വാഹനമാണ് സാറ്റലൈറ്റ് ലോഞ്ച് വെഹിക്കിൾ -3. ഇതിലൂടെ ഉപഗ്രഹം നിർമിക്കാൻ മാത്രമല്ല വിക്ഷേപിക്കാനും സാധിക്കുമെന്ന് ഭാരതം തെളിയിച്ചു. ചന്ദ്രനിലേക്കും ചൊവ്വയിലേക്കും ബഹിരാകാശ പേടകങ്ങൾ അയയ്ക്കുന്നതിന് കൂടിയുള്ള പ്രചോദനമായിരുന്നു ഇത്.

INSAT: അടുത്തത് ഇൻസാറ്റാണ്. 1983ലാണ് ഇൻസാറ്റ് സീരീസ് ടെലികമ്മ്യൂണിക്കേഷൻ വിഭാഗത്തിനായി വിക്ഷേപിച്ചത്. ഇന്ന് ഏഷ്യ-പസഫിക് മേഖലയിലെ ഏറ്റവും വലിയ ആഭ്യന്തര ആശയവിനിമയ സാറ്റലൈറ്റ് ശൃംഖലകളിൽ ഒന്നാണ് ഇൻസാറ്റിന്റേത്. ഭൂസ്ഥിര ഭ്രമണപഥത്തിൽ ഒമ്പത് പ്രവർത്തനക്ഷമമായ ആശയവിനിമയ ഉപഗ്രഹങ്ങളുള്ളതാണ് ഇന്ത്യൻ നാഷണൽ സാറ്റലൈറ്റ് സിസ്റ്റം.

RISAT-1: 2012 ഏപ്രിൽ 26-ന് RISAT-1 വിക്ഷേപിച്ചു. ഇരുട്ടിലും, കനത്ത മഴയിലും വരെ ഹൈ റെസല്യൂഷൻ ചിത്രങ്ങൾ പകർത്താൻ കഴിവുള്ള ഇന്ത്യയുടെ ആദ്യത്തെ റഡാർ ഇമേജിംഗ് ഉപഗ്രഹമാണ് റിസാറ്റ് 1.

മംഗൾയാൻ: 2013 നവംബർ അഞ്ചിനാണ് നിർണായകമായ നേട്ടം ഇസ്രോ കൈവരിച്ചത്. നാസ പോലും നേടാത്ത ഒരു ചരിത്രം ഇവിടെയാണ് ഇസ്രോ നടത്തിയത്. 2014 സെപ്റ്റംബർ 24 ന്, ആദ്യ ശ്രമത്തിൽ തന്നെ ചൊവ്വയിലെത്തുന്ന ആദ്യ രാജ്യമായി ഇന്ത്യ മാറിയെന്നതാണ് ആ നേട്ടം.

GSLV, GSAT മിഷൻ: 2001-ൽ ജിയോസിങ്ക്രണസ് സാറ്റലൈറ്റ് ലോഞ്ച് വെഹിക്കിൾ എന്ന GSLV ലോഞ്ച് ചെയ്തു. GSAT-19 ഉൾപ്പെടെയുള്ള ഇന്ത്യയുടെ അക്കാലത്തെ ഏറ്റവും ഭാരം കൂടിയ ഉപഗ്രഹവും ഈ സീരീസിലുണ്ടായിരുന്നു.

PSLV-C37: ഐഎസ്ആർഒയുടെ പോളാർ സാറ്റലൈറ്റ് ലോഞ്ച് വെഹിക്കിൾ (പിഎസ്എൽവി) 2017 ഫെബ്രുവരി 15-നായിരുന്നു. ഇതിൽ 104 ഉപഗ്രഹങ്ങൾ വിക്ഷേപിച്ചുകൊണ്ട് ലോക റെക്കോർഡിട്ട് ഇന്ത്യയുടെ ആകാശ പ്രയത്നങ്ങളെ വാനംമുട്ടെയെത്തിക്കാൻ ഇസ്രോയ്ക്ക് കഴിഞ്ഞു.

NAVIC: 2018-ൽ ഇസ്രോ നാവിക് എന്ന സ്വദേശ നാവിഗേഷൻ സിസ്റ്റം പൂർത്തിയാക്കി. യുഎസ് നിയന്ത്രിക്കുന്ന ജിപിഎസിന് സമാനമായ സേവനമാണിത്. എന്നാൽ GPS-ൽ നിന്ന് വ്യത്യസ്തമായി, സുരക്ഷയ്ക്കും പരമാധികാരത്തിനും നിർണായകമായ സ്ഥല അധിഷ്ഠിത സേവനങ്ങളിൽ നാവിക് ഇന്ത്യയെ സഹായിക്കുന്നു.

ചാന്ദ്രയാൻ മിഷൻ 1,2,3: ഇന്ത്യയുടെ ആദ്യത്തെ ചാന്ദ്ര ദൗത്യമായ ചന്ദ്രയാൻ-1 2008-ലാണ് ലോഞ്ച് ചെയ്തത്. ചന്ദ്രനിൽ ജലാംശമുണ്ടെന്ന് കണ്ടെത്തിയത് ചാന്ദ്രയാൻ 1 ആണ്. 11 വർഷങ്ങൾക്ക് ശേഷം 2019-ൽ ചന്ദ്രയാൻ-2 വിക്ഷേപണം നടത്തി. 2023 ഓഗസ്റ്റ് 23 ന് ചന്ദ്രന്റെ ദക്ഷിണധ്രുവത്തിന് സമീപം വിജയകരമായി ലാൻഡിംഗ് നടത്തിയ ചന്ദ്രയാൻ-3 മറ്റൊരു നിർണായക വിജയമാണ്.

Aditya-L1: 2023 സെപ്റ്റംബർ 2-ന് വിക്ഷേപിച്ച ആദിത്യ-എൽ1 മറ്റൊരു നിർണായകനേട്ടമാണ്. സൂര്യനെ പഠിക്കാനുള്ള ഇന്ത്യയുടെ ആദ്യത്തെ സമർപ്പിത ദൗത്യമാണ് ആദിത്യ എൽ1. സൗര കൊറോണ, ക്രോമോസ്ഫിയർ, സൗരവാതം എന്നിവ നിരീക്ഷിക്കുന്നതിനുള്ളതാണ് ആദിത്യ എൽ1.

ഇസ്രോയുടെ പ്രധാന കേന്ദ്രങ്ങൾ…

ഇന്ത്യയിൽ പല സംസ്ഥാനങ്ങളിലും കേന്ദ്രഭരണപ്രദേശങ്ങളിലും ഇസ്രോയുടെ വിവിധ പ്രവർത്തനങ്ങൾ നടക്കുന്നു. തിരുവനന്തപുരത്തെ തൂമ്പയിലുള്ള VSSC ഇതിലൊന്നാണ്.

Indian Space Research Organisation ആസ്ഥാനം: ബെംഗളൂരു, കർണാടക

വിക്രം സാരാഭായ് സ്‌പേസ് സെന്റർ (വിക്ഷേപണ വാഹനങ്ങൾ വികസിപ്പിക്കുന്നത്): തിരുവനന്തപുരം

സതീഷ് ധവാൻ സ്‌പേസ് സെന്റർ (ഐഎസ്ആർഒ ദൗത്യങ്ങൾക്കായുള്ള വിക്ഷേപണ സ്ഥലം): ശ്രീഹരിക്കോട്ട ഐലൻഡ്, ആന്ധ്രാപ്രദേശ്

സ്‌പേസ് ആപ്ലിക്കേഷൻ സെന്റർ (ഉപഗ്രഹങ്ങൾക്കായുള്ള സെൻസറുകളും പേലോഡുകളും വികസിപ്പിക്കുന്നത്): അഹമ്മദാബാദ്

U R റാവു സാറ്റലൈറ്റ് സെന്റർ (ഉപഗ്രഹങ്ങൾ ഡിസൈൻ ചെയ്യുന്നതും വികസിപ്പിക്കുന്നതും, കൂട്ടിച്ചേർക്കുന്നതും, പരീക്ഷിക്കുന്നതും ഇവിടെയാണ്): ബെംഗളൂരു

മാസ്റ്റർ കൺട്രോൾ ഫെസിലിറ്റീസ് (ജിയോസ്റ്റേഷണറി സാറ്റലൈറ്റ് സ്റ്റേഷൻ): കർണാടകയിലെ ഹാസൻ, ഭോപ്പാൽ, മധ്യപ്രദേശ്

ISRO ആൻട്രിക്സ് കോർപ്പറേഷൻ (ഐഎസ്ആർഒയുടെ വാണിജ്യ വിഭാഗം): ബെംഗളൂരു

നാഷണൽ റിമോട്ട് സെൻസിംഗ് സെന്റർ (റിമോട്ട് സെൻസിംഗ് ഡാറ്റ സ്വീകരിക്കുകയും പ്രോസസ്സ് ചെയ്യുകയും ചെയ്യുന്നു): ഹൈദരാബാദ്

Also Read: Independence Day 2025: WhatsApp, ഫേസ്ബുക്ക്, ഇൻസ്റ്റയിൽ ഷെയർ ചെയ്യാൻ ആശംസകൾ ശടപടേന്ന് AI റെഡിയാക്കി തരും…